***

- Къаналла тIегIерта йоьлла…

ГIийла Iара кIентан да.

КIант тIекхайкха шена аьлла,

Кечвелира весет дан.

                 ***

Веъна кIант а дIахIоьттира…

Гатдора цо чIогIа са.

Дас весет а дIадолийра,

КIанта дугIуш дикка ла.

                 ***

«Массо адам дала дезар,

Шеко йоццуш бакъдерг ду.

Дена кIант шен дукха везар,

Весет кхочуш дайта ду.

                      ***

Къа ду стеган цIе-кIур дайна,

Цхьалха висча къаналлехь,

Нехан кара шен дегI делла,

Ойла хьийзаш паналлехь.

                  ***

Вола, кIант, хьо суна герга,

Дикка догIа ахь соь ла.

Хоьттуш дагIац валар керта,

ДегIачуьра къастош са.

                  ***

Цхьаъ бен воцург хьо хиларна,

Къахета сов суна хьох.

Къаста дезаш вай хиларна,

Дуьйцу ас, хьо кхета сох.

                       ***

ТIаьхьа виса хьо сан хилар,

Дала дина совгIат ду.

Весет кхочуш дийриг хилар,

Дагахь чIогIа тешна ву.

                    ***

Сайн некъ кхин дIа лелабайта,

КIант, ас хьоьга кховдабо.

Дайн Iадатийн лерам байта,

Хийла дас кIант кхиаво.

                    ***

Собар, собар, хIай кIант, собар!

Велхарх кхиац хIумма а.

Деле доьхуш хьайна собар,

Диц ма делахь хIумма а!                              

                     ***